കോവിഡ് 19: ദോഹയില്‍ നിന്ന് 183 പ്രവാസികള്‍ കൂടി നാട്ടിലെത്തി
ദോഹയില്‍ നിന്നുള്ള ഐ.എക്‌സ് - 374 എയര്‍ ഇന്ത്യ എക്‌സ്പ്രസ് വിമാനം 183 യാത്രക്കാരുമായി ഇന്ന് (മെയ് 18) രാത്രി 10.30 ന് കരിപ്പൂരിലെ കോഴിക്കോട് അന്താരാഷ്ട്ര വിമാനത്താവളത്തിലെത്തി. ഒമ്പത് ജില്ലകളില്‍ നിന്നായി 181 പേരും രണ്ട് തമിഴ്‌നാട് സ്വദേശികളുമാണ് വിമാനത്തിലുണ്ടായിരുന്നത്. 76 പുരുഷന്മാരും 107 സ്ത്രീകളും. 65 വയസിന് മുകളില്‍ പ്രായമുള്ള 15 പേര്‍, 10 വയസിനു താഴെ പ്രായമുള്ള 44 കുട്ടികള്‍, 61 ഗര്‍ഭിണികള്‍ എന്നിവരാണ് സംഘത്തിലുണ്ടായിരുന്നത്.
കോഴിക്കോട് - 73, മലപ്പുറം - 44, ആലപ്പുഴ - ഒന്ന്, എറണാകുളം - ഒന്ന്, കണ്ണൂര്‍ - 24, കാസര്‍കോഡ് - 17, പാലക്കാട് - 17, തൃശൂര്‍ - രണ്ട്, വയനാട് - രണ്ട് എന്നിങ്ങനെയാണ് യാത്രക്കാരുടെ ജില്ല തിരിച്ചുള്ള കണക്ക്. ഇവര്‍ക്കൊപ്പം രണ്ട് തമിഴ്‌നാട് സ്വദേശികളും സംഘത്തിലുണ്ടായിരുന്നു.
രണ്ട് കോഴിക്കോട് സ്വദേശികള്‍ ഉള്‍പ്പടെ നാല് പേരെ വിവിധ ആരോഗ്യ പ്രശ്‌നങ്ങളാല്‍ ആശുപത്രികളില്‍ പ്രവേശിപ്പിച്ചു. ഇതില്‍ കണ്ണൂര്‍ സ്വദേശിക്കു മാത്രമാണ് കോവിഡ് ലക്ഷണങ്ങള്‍ കണ്ടത്. ഇയാളെ കോഴിക്കോട് ഗവ. മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. വിവിധ ആരോഗ്യ പ്രശനങ്ങളുള്ള രണ്ട് കോഴിക്കോട് സ്വദേശികളെ മഞ്ചേരി ഗവ. മെഡിക്കല്‍ കോളജ് ആശുപത്രിയിലും ഗര്‍ഭിണിയായ മലപ്പുറം സ്വദേശിനിയെ കോഴിക്കോട് ഗവ. മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു.
കോഴിക്കോട് - 12, മലപ്പുറം - അഞ്ച്, ആലപ്പുഴ, എറണാകുളം, തൃശൂര്‍, വയനാട് ജില്ലകളില്‍ നിന്ന് ഓരോ യാത്രക്കാര്‍, കണ്ണൂര്‍ - മൂന്ന്, കാസര്‍കോട് - ഏഴ്, പാലക്കാട് - നാല് യാത്രക്കാരെ അതത് ജില്ലകളിലെ കോവിഡ് പരിചരണ കേന്ദ്രങ്ങളില്‍ നിരീക്ഷണത്തിലാക്കി. കോഴിക്കോട് കുന്നമംഗലം ഇന്‍സ്റ്റിറ്റിയൂട്ട് ഓഫ് മാത്തമാറ്റിക്സ് ഹോസ്റ്റലില്‍ ആണ്‌ നിരീക്ഷണ സൗകര്യം ഒരുക്കിയത്.
144 പേരെ സ്വന്തം വീടുകളില്‍ ആരോഗ്യ വകുപ്പിന്റെ പ്രത്യേക നിരീക്ഷണത്തിലാക്കി. കോഴിക്കോട് - 59, മലപ്പുറം- 38, കണ്ണൂര്‍ - 20, കാസര്‍കോഡ് - 10, പാലക്കാട് - 13, തൃശൂര്‍, വയനാട് ജില്ലകളിലെ ഒരോ യാത്രക്കാര്‍, തമിഴ്‌നാട് സ്വദേശികളായ രണ്ട് പേര്‍ എന്നിവരാണ് സ്വന്തം വീടുകളിലേയ്ക്ക് മടങ്ങിയത്. ഇവര്‍ പൊതു സമ്പര്‍ക്കമില്ലാതെ പ്രത്യേക മുറികളില്‍ കഴിയണം.
