കോവിഡ് 19: ജിദ്ദയില്‍ നിന്നും 160 പ്രവാസികള്‍ കൂടി മടങ്ങിയെത്തി
കോവിഡ് - 19 ന്റെ പശ്ചാത്തലത്തില്‍ ജിദ്ദയില്‍ നിന്നുള്ള പ്രത്യേക വിമാനത്തില്‍ 160 പ്രവാസികള്‍ കൂടി ഇന്ന് (മെയ് 29) തിരിച്ചെത്തി. കരിപ്പൂരിലെ കോഴിക്കോട് അന്താരാഷ്ട്ര വിമാനത്താവളത്തില്‍ രാത്രി 11.40 ന് എത്തിയ എ.ഐ - 960 എയര്‍ ഇന്ത്യ വിമാനത്തില്‍ സംസ്ഥാനത്തെ 13 ജില്ലകളില്‍ നിന്നുള്ള 157 പേരും മൂന്ന് കര്‍ണ്ണാടക സ്വദേശികളുമാണ് ഉണ്ടായിരുന്നത്.
65 വയസിന് മുകളില്‍ പ്രായമുള്ള 8 പേര്‍, 10 വയസിനു താഴെ പ്രായമുള്ള 43 കുട്ടികള്‍, 59 ഗര്‍ഭിണികള്‍ എന്നിവരുള്‍പ്പെടുന്നതായിരുന്നു സംഘം. തിരിച്ചെത്തിയവരില്‍ മലപ്പുറം ജില്ലയില്‍ നിന്നുള്ള 5 പേരെ വിവിധ ആരോഗ്യ പ്രശ്‌നങ്ങളാല്‍ ആശുപത്രികളില്‍ പ്രവേശിപ്പിച്ചു. 26 പേരെ വിവിധ കോവിഡ് കെയര്‍ സെന്ററുകളിലും പ്രകടമായ ആരോഗ്യ പ്രശ്‌നങ്ങളില്ലാത്ത 129 പേരെ സ്വന്തം വീടുകളില്‍ ആരോഗ്യ വകുപ്പിന്റെ പ്രത്യേക നിരീക്ഷണത്തിലുമാക്കി. ഇവര്‍ പൊതു സമ്പര്‍ക്കമില്ലാതെ പ്രത്യേക മുറികളില്‍ കഴിയണം.
തിരിച്ചെത്തിയവരുടെ ജില്ലാ അടിസ്ഥാനത്തിലുള്ള കണക്കുകള്‍: മലപ്പുറം - 87, ആലപ്പുഴ - 8, ഇടുക്കി - 3, കാസര്‍കോട് - 2, കൊല്ലം - 6, കോഴിക്കോട് - 20, എറണാകുളം - 1, കോട്ടയം - 6, പാലക്കാട് - 7, പത്തനംതിട്ട - 3, വയനാട് - 4, കണ്ണൂര്‍ - 7, തൃശൂര്‍ - 3. കര്‍ണ്ണാടക സ്വദേശികള്‍ - 3.
