കൃത്യമായ മറുപടി, കൃത്യമായ നടപടി; 100 ദിനങ്ങൾ 18,000 കോളുകൾ

post

* മാതൃകയായി സ്റ്റേറ്റ് കോവിഡ് കോൾസെന്റർ

കോവിഡ്-19 പ്രതിരോധത്തിൽ സ്തുത്യർഹമായ സേവനം നടത്തുന്ന സ്റ്റേറ്റ് കോവിഡ് കോൾ സെന്റർ 100 ദിനങ്ങൾ പിന്നിടുകയാണ്. ചൈനയിലെ വുഹാനിൽ കോവിഡ് സ്ഥിരീകരിച്ചതിന് പിന്നാലെ സംസ്ഥാനത്ത് സജ്ജമാക്കിയ കൺട്രോൾ റൂമിന്റെ ഭാഗമായാണ് 24 മണിക്കൂറും പ്രവർത്തിക്കുന്ന ആരോഗ്യ വകുപ്പിന്റെ നേതൃത്വത്തിൽ കോൾ സെന്റർ സജ്ജമാക്കിയത്. ഇതുവരെ 18,000 ലധികം കോളുകളാണ് സ്വീകരിച്ച് തുടർനടപടികൾ സ്വീകരിച്ചത്. മികച്ച സേവനം നടത്തിയ സംസ്ഥാന കോൾ സെന്റർ ജീവനക്കാരെ ആരോഗ്യ വകുപ്പ് മന്ത്രി കെ.കെ. ശൈലജ ടീച്ചർ അഭിനന്ദിച്ചു.

രോഗികളുടെ എണ്ണം കൂടിയതനുസരിച്ച് പൊതുജനങ്ങൾക്ക് കോവിഡ് 19 രോഗത്തെ സംബന്ധിച്ച സംശയങ്ങൾ ദൂരീകരിക്കുന്നതിനും പ്രധാന വിവരങ്ങൾ കൈമാറുന്നതിനും 0471 2309250, 0471 2309251, 0471 2309252, 0471 2309253, 0471 2309254, 0471 2309255 എന്നീ നമ്പരുകൾ സജ്ജമാക്കി. കോൾസെന്ററിൽ വരുന്ന കോളുകൾക്ക് സംശയ ദൂരീകരണം നടത്തുകയും ലഭിക്കുന്ന പ്രധാന വിവരങ്ങൾ നടപടികൾക്കായി വിവിധ ജില്ലകളിലേക്കും വിവിധ വകുപ്പുകളിലേക്കും കൈമാറുകയും ചെയ്യുന്നു.

കോവിഡിനെക്കുറിച്ചുള്ള പൊതുജനങ്ങളുടെ ചോദ്യങ്ങൾ ഫലപ്രദമായി കൈകാര്യം ചെയ്യാൻ 45 ഓളം വരുന്ന ജെഎച്ച്‌ഐ വിദ്യാർത്ഥികൾക്കും നഴ്‌സിംഗ് വിദ്യാർത്ഥികൾക്കും പരിശീലനം നൽകി നിയമിച്ചു. ഇപ്പോൾ ആരോഗ്യ വകുപ്പ് ഡയറക്ടറേറ്റിലെയും എൻഎച്ച്എമ്മിലെയും പബ്ലിക് ഹെൽത്ത് ട്രെയിനിംഗ് സ്‌കൂളിലെയും ജീവനക്കാരേയും ഉൾപ്പെടുത്തിയാണ് 24 മണിക്കൂറും കോൾ സെന്റർ പ്രവർത്തിക്കുന്നത്. ജില്ലാ കോൾ സെന്ററുകൾക്കും ദിശയ്ക്കും ദിവസേനയുള്ള റിപ്പോർട്ട് ലഭിക്കുന്നതിന് ഒരു ഓൺലൈൻ റിപ്പോർട്ടിംഗ് സംവിധാനം ഏർപ്പെടുത്തി. ഈ റിപ്പോർട്ടിംഗ് സിസ്റ്റത്തിൽ ഇൻകമിംഗ് കോളുകളുടെ എണ്ണം, കോൾ വിവരങ്ങൾ, കോളിന്റെ സ്വഭാവം എന്നിവ അനുസരിച്ച് 15 ആയി തരം തിരിക്കുന്നു.

ഈ റിപ്പോർട്ടുകളുടെ വിശകലനത്തിൽ നിന്ന്, ആരംഭ ദിവസങ്ങളിൽ കോളുകളുടെ സ്വഭാവം രോഗത്തെപ്പറ്റിയും രക്തപരിശോധന, വീട്ടിലെ നിരീക്ഷണം, രോഗ ലക്ഷണങ്ങൾ എന്നിവയെക്കുറിച്ചുമായിരുന്നു. പിന്നീട് ടൂർ, ഫംഗ്ഷനുകൾ, മീറ്റിംഗ് എന്നിവയെക്കുറിച്ചും മറ്റ് രാജ്യങ്ങളിലേക്കുള്ള യാത്രകളെക്കുറിച്ചും സംശയമുണ്ടായിരുന്നു. ഇപ്പോൾ മറ്റ് സംസ്ഥാനങ്ങളിലുള്ളവരും രാജ്യങ്ങളിലുള്ളവരും സ്വന്തം നാട്ടിൽ എത്തുന്നതിനെപ്പറ്റിയുള്ള സംശയങ്ങൾ ചോദിച്ച് വിളിക്കാറുണ്ട്. പ്രതിദിനം 600ലധികം കോളുകൾ വരെ സ്റ്റേറ്റ് കോവിഡ് കോൾ സെന്ററിൽ എത്താറുണ്ട്.